NA VAKAMAREQETI NI VOSA

O Kelerayani Lesikinavosa e dua vei ira na isevu ni gonevuli me volayaca ena Porakaramu ni Veika Vakaviti ena tagede ni Postgraduate ena Univesitini Ceva ni Pasivika mai Laucala. O koya e dua talega vei ira na vukei ena sikolasivi ni Matabose ni iLavo Maroroi ni iTaukei ena karua ni wasewase ni vuli ni 2021, ka nona ituvatuva tiko ga me tosoya na nona vuli kei na kilaka ena vuku ni vosa kei na itovo vakaviti.

O Kelerayani e cavu tu mai na koro o Sawani, ena yasana vakaturaga o Naitasiri ka ulumatua vei ratou na lewe tolu na tacina. E a susu ka vuli ga mai na koro ka matai ni gone me mai na nona vuvale me rawata na nona koroi ni vuli mai na Univesiti. “Au dau malele vakalevu kina vuli ni veikavakaviti, ka se tekivu niu sa gone lailai sara. Qo na vuni noqu digitaka meu cakava na porokaramu qo”, a varaitaka o koya.

“Tekivu ena noqu vuli ni primary mai Sawani me yacova na tagede ni secondary e Adi Cakobau, au dau rawata vinaka tu ga na lesoni ni veika vakaviti. E sega soti ni levu na noqu vuli lesoni kina, ia baleta niu sa malele rawa tiko kina, e vukea sara vakalevu na noqu vulica. Na gauna au sa dewa kina vuli torocake e Muanivatu, au sa vadeitaka e lomaqu meu sa na tomana tiko ga na vuli qo”,e tukuna o Kelera.

Me vakataki ira na gone ra susu ena noda veikorokoro, e dau taleitaka vakalevu o Kelera na vakarogo italanoa makawa se itukuni ni kalouvu kei na buli vanua, vakabibi ni ra dau talanoa na qase.

Nikua, ni sa mai ciqoma na nona sikolasivi ni vuli ni veika vakaviti e USP, e sa nona gagadre saraga me vakatitobutaka na nona kila me baleta na nona vosa, itovo kei na veika e kilai tani kina. Ena saga talega o Kelera me vakauqeti ira na nona icaba me ra mai tovolea na vuli qo baleta ena vakararamataka nodra rai ka na vakadeitaki ira talega.

E ituvatuva tiko nei Kelera ni cava na vuli qo, me sa na tarava saraga na vuli ni Masters ka tekivutaki talega na nona vakadidiketaka na veika me baleta na vosa kei na itovo ni nona vanua. “Au via tekivu saraga ena vakadidike me baleta na noqu koro o Sawani, na kena vosa, itovo kei na veika e kilai tani kina kei na kena vakabulabulataki tiko”.

Ena vuli ni degree mai USP, a raica kina o Kelera na bibi ni kena maroroi kei na vakabulabulataki tiko na vosa ni vanua vakabibi saraga mai nona vanua. E vakaraitaka o Kelera ni, “vakauqeti au na vuli qo kei na sikolasivi ni Matabose ni iLavo Maroroi ni iTaukei meu sa tekivu cau ena kena vadidiketaki ka vakabulabulataki na noqu vosa ni vanua mai na koro, baleta ni dua na iwase levu vei keimami, sa sega ni qai vosataka tiko edai”.

Na Matabose ni iLavo Maroroi ni iTaukei a solia e lima na Sikolasivi ni post-graduate studies e USP ena ikarua ni wasewase ni Vuli ni 2021 ka dua vei ira o Kelerayani.