SEGA NI TAROVA NA NODRA VULI NA MARAMA NI MATAILOBAU, NAITASIRI, NA SOGOLAKI NI VEITOSOYAKI.
A tekivutaki ena vula o Maji 2021 na nodra vuli ni bisinisi na marama ni Matailobau ena iwalewale ni Vuli Veiraimata. Ia na kena sa mai basika na mate dewa na Covid 19, sa mai vakayagataki na monalivaliva kei na vatavata ni volamata me rawa ni tomani ka vakacavari kina vuli mai Nairukuruku.
Ena vula o Evereli, a mai sogosogo kina na noda matanitu ena vuku ni kena sa tekivu dewa totolo na mate na Covid 19, ka mai vakavuna me cegu kece na veiqaravi, bisinisi, lotu kei na vuli. Ia na sogosogo qo e sega ni vakayaloyalolailaitaki ira na marama ni Tikina o Matailobau, ena kena mai tomani na nodra vuli ni bisinisi ena ivatavata ni monalivaliva vakabibi na sala ni veitaratara ena ivolamata.
E veitokonitaka na vuli qo na Matabose ni iLavo Maroroi ni iTaukei (TTFB) kei na Fiji National University (FNU) me rawa ni ra vakayaragitaki e lewe onosagavulu na maramamai ra yabaki 17 kina 66, ena kilaka ni culacula, cakaulu, buli sasauni, kesakesa kei na kena cicivaki vakabisinisi.
Ni bera ni caka na sogosogo, a sa qaravi oti taumada e va na macawa ni vuli veiraimata vei ira na marama mai na veikorokoro ena lomani tikina o Matailobau, oka kina o Matailobau, Nabena, Taulevu, Delaitoga, Navuniyasi and Nairukuruku.
Ia nikua, sa qaravi na vuli ena monalivaliva ka sa vakau kece i Nairukuruku na iyaya kei na misini kece a vakayagataki ena vuli, ka ra digitaki e vica na marama me ra yadrava ka maroroya na iyaya oqo. Era wasei vaka va na marama ena veikoro oqo, ra tiko na vuli culacula, vuli cakaulu, caka sasauni kei na vuli kesakeksa.
Above: Naomi Likuyameyame left and Elisa Rabaleilekutu right of Taulevu village, receiving a sewing machine being sent across by FNU trainers for their training.
E vakayagataki na veitaratara ena volamata me ra caka vuli ka vakamacala mai kina na qasenivuli mai na FNU, ka vakau kece vei ira na gonevuli na ivakamacala ni nodra lesoni ena sala vata qo. Era vakauqeti talega na gonevuli me ra veiwasei vakataki ira me rawa ni kasa vinaka na veika era vulica tiko.
E varaitaka na Vunilewa ni TTFB, o Aisake Taito, ni veivakauqeti vakalevu na kena mai vakayagataki na monalivaliva me tomani kina na vuli vei ira na marama mai na loma saraga ni nodra dui vale .
Above: Ladies take a moment from their small training bubble for a picture. Wainise Baledrokadroka (in the background), with phone in-hand receives instructions from the FNU trainer via the Facebook messenger, which she will in turn share with Melenia Gonerogo (closest to camera), as a peer-learning exercise.
Sa toka qo na isema kina ivakamacala nei dua na lewenivuli mai na koro o Taulevu, o Elisa Rabaileilekutu me baleta na vuli ni culacula a lewena o koya: https://youtu.be/7vXlSlqNM40.
E varaitaka na Liuliu Vakatawa ni Tabana ni Creative Arts e FNU, o Vasiti Baledrokadroka ni ratou marautaka vakalevu ni laurai na kena toso vinaka tiko nodra vuli na marama ena monalivaliva, vakabibi ni ra tiko kece mai nakoro. Sa waraki tiko ga na kena dola tale na veitosoyaki, me tomani tale na vuli veiraimata e Nairukuruku ia sa na veisau na ituvatuva ni vuli, me ra sa vuli e vesiga ia me macawa rua ga.
E sa tuvani tiko me qai gauna e sa dola tale kina na veilakoyaki, sa rawa ni ra tekivu volitaka yani nodra ivoli e tautuba. E na saga tale ga na TTFB me veisemati kei na so na kabani se soqosoqo e ra na malele kina nodra ivoli na marama.
E inaki levu ga ni vuli qo, me vakarabailevutaka na gaunisala ni rawa ilavo vei ira na marama kei na tabagone ena noda veikorokoro ka nuitaki ni na vukei ira, vakabibi ena gauna dredre sa mai sotavi tiko edai.
Cakacakavata na FNU & TTFB
Ena vula e Veverueri, rau sainitaka e dua na veidinadinati se MOU na Matabose ni iLavo Maroroi ni iTaukei kei na Fiji National University. E kena inaki levu ga, me rau na veitokonitaki na nodra vuli ni bisinisi na marama ena taudaku ni koro ni cakacaka. Na vuli qo ena Tikina o Matailobau, Naitasiri e kena isevu tiko ka matai talega ni gauna me rau cakacaka vata kina na Tabana e rua. Na College of Humanities and Education ni FNU, e varautaka ka cicivaka na vuli qo, ka qai itavi ni Matabose ni iLavo Maroroi na kena vakailavotaki ka sa varautaka oti tu e $65,000 me baleta na vuli qo.