Fąiva ‘e Fäega, hanue ta ‘e ‘on fątumanava

14 ne Epereli 2022

Le’ fa ne Wainibuka le Waisake Raliwala. Ią fa ne Naituvatuva, Wainibuka ‘e hanuet te Tailevu ka ia ta le’ het ‘on ono ne töh se ią ne mea’me’a ‘e kaunohoag ta. ‘E ‘on mäür te’ ią noh kikia ‘e Ues ta, fup kikia se tekäe ąf ‘e Sabeto täe ‘el se taon ‘e Nadi.
Waisake rak ‘e Vuda District School ‘e kilas 1 se 4 ma kotä la’ se Gurkul Primary school la kila 5 se 8. Ią rak ‘e Pandit Vishnu Deo Memorial College ‘e Sekänri ta, kamat ‘e Fąu 9 se 13. ‘E fąu 2017, ią sur la rak ‘e University of the South Pacific, re’ia ‘on faki’oag heta la hąitąuąg ma fąu häk la rak’åk te. Ią a’våh ‘on faki’oag heta ‘e laloag ne fąu 3 ma haf he.
“Gou ‘or un ma rak ‘e av sąi ne rako ‘e te’ ne av ne Geography ma Education resoni la a’soko ‘e ‘otou ‘amnąkit la våh mij ‘otou poag ne faki’oag heta. Te a’ferehiti ‘e Sepitempa fąu 2020, le’ fa ne Wainibuka ne vąhiąg te po våh ‘on faki’oag heta ‘e laloag ne ta av luąk he.
Hoi’åk, Waisake po ‘e fąut öf se’ ta scholarship he ne ią le’et ‘e iris ne hil la re Post Graduate Diploma ‘e Fijian Studies ma ią a’våh ‘on faki’oag hete’is ma la hąp’åk fą’purou ne rako ‘e huąl ne Me ‘e fąu te’is.
Noh fakmane’ąkia ‘on fupfupu ‘e itu’u, Waisake a’häe hö’e huąg pa ‘uą’uąki se av ma’oi ‘on ö’fa ta la hoa’ ią se so’ ne mou se kąunohoga ka tape’ ma se kato’ag ‘e laloag hanua.
“’Otou ö’fa ta pa ‘es la hahan’åk se gou ‘otou ag fakhanua, ‘otomis la toleag ne fatogia ‘e te’ ne he’oga ma tes tu hoi’åk.” ią ‘eag “Gou a’mamnåk se ag fakhanua ma tąupir se puer’åk ne aga ‘e ‘otou mokoi la hele’ se avat gou mafua e. Gou po la räe se pumuą ne te’i ma gou fakmanią’åk fakapąu,” ią sok’ąkiof
Waisake ‘on huga mah se rak’åk te, ka ti’ se’ ‘on la rak’åk te hąisoag ‘e hanisi ‘e fąu mumuą ne ‘on rako te Univeseti, hąila’oag ma av luąk het ią rak’åk te ‘e ‘ątmotu, Koro ‘e a’ofiąg ne fąu 2021.
“Otou huąg he re rako la hąiasoagan lä’riri’i la po la iris la ‘esao ka sok la famör puer lelei ‘e terąni te kā. ‘Ereko ‘otou rak te ‘e ‘otou famör re rak ‘e Paraimari po ma muą’åk gou la fa re rakot ne ‘oaf la hąiasoag se lä’riri’i ‘e te’ ne te ne iris kątu la ląfuof sin.
Waisale kotä a’fumou’åk la re rak hąisoag ‘e University of the South Pacific Fijian Language department. Fuąg het ne ‘eleaf se ‘on ‘amnåk heta ‘e Rako la ‘atakoa’ąkia a’esao’åk ne fäega ma poto ‘e fäefäega.
Gou ‘oaf ne gou po ma hąiasoagan lä’riri’i toa’ rako la rak ta te he his ne hąitąuąg la a’el’ąkia se ‘osa fäega. ‘E hanhapat, ią ta ąriget se ta famorit” ią ‘ąligen
‘On ‘amnąki la ‘ut’ąkia ‘on rako ‘e Fäega ma ‘ąiröt’åk la re ta faki’oag ne Tąku ‘e maj te’is ‘e fąu his ne kanam ‘og.
Rogrog ne mou se porakaräm ne Fäeag Fit ta.
iTaukei Trust Fund Board tög ne rak porakaräm ne Fäeag Fit ta ‘e USP. ‘E fąu 2021, faki’oag fo’ou ne Post Grad Diploma ‘e Fijian Studies nā ma iris liąm a’våh ‘oris rako ma tąria hąp’ąkiąg ne fą’purou ta ‘e fąu te’is. ‘E fąu saghul ne våh se’, TTFB tög rak kąurakoag ruą ‘e Ministeri ne iTaukei Affairs ma Ministeri ne Rako ‘e rakoag ne ‘oris Diploma ‘e Fijian Language Studies.
A’vąhia

Le’ fa ne Wainibuka le Waisake Raliwala. Ią fa ne Naituvatuva, Wainibuka ‘e hanuet te Tailevu ka ia ta le’ het ‘on ono ne töh se ią ne mea’me’a ‘e kaunohoag ta.