TTFB MA RURAL WOMEN ENTREPRENEURSHIP TRAINING FNU, A’SOK TA “GRADUATION CEREMONY” MA ‘IH PRIME MINISTER NE FITI

ITAUKEI TRUST FUND BOARD (TTFB) MA RURAL WOMEN ENTREPRENEURSHIP TRAINING PROGRAM NE FIJI NATIONAL UNIVERSITY (FNU), A’SOK TA “GRADUATION CEREMONY” MA ‘IH PRIME MINISTER NE FITI MA MINISTER NE ITAUKEI AFFAIRS, SUGAR AND FORESTS.

E ‘i, Prime Minister ne Fiti ma Minister ne iTaukei Affairs, Sugar Industry ma Forests, Hon. Rear Admiral (Retired) Josaia Voreqe Bainimarama, ta ‘ih la “Chief Guest” ‘e kato’ag ne na puk ne aier’ąkige ne Rural Womens’ Entrepreneurship Training Programme ‘e koro te Nairukuruku e Matailobau e Naitasiri,

Hon. Prime Minister ‘e on fäeag ta ‘ea “Rural Entrepreneurship Training ne Fiji National University (FNU) ma iTaukei Trust Fund Board, ‘e oria te ag’esea te’is amnåk a’lelei pau la rak’åk pot ma’oi ne garue ‘e aoag ne koroa se iris ne rako ma oris kaunohoga. Otomis amnąki la ut’åk se rere rako ma sal ma’oi se hąina ‘e oris gargarue”.

Nono ka Fiti pa po ‘on ne’ne’ aier heta, ma ‘is kop la ‘io se poto ma rak on famör atakoa, eagke ‘ea fa esea ne 50% e hanue te’,

Av ne väh se’ hąina noh kel’åk ma kikia oris ‘ut se rere e te ma’oi, ka oris ‘utu se rere po se tea’at on våo ‘e amnåk ma garue ne otou matantu ta. Hąian ma’oi po ma a’väh a’lelei oris rako e univesiti ma po fuag lelei e garue lamlam ma’oi, ma e laloag ne matantu ta, ma ‘e pesnese; ma foh fo’ou ma’oi pär mäür on hąina ‘e ag hąipeluag ma ag raksa’ ma’oi ne a’mou soksok se irisa.

Rural Women Entrpreneurship Training Programme te’is, Prime Minister ‘ea, ta rako ne a’ne’ne’ a’lelei amnåk ne matantu ta, a’ti’ se’ ne matantuta amnåk’åk la ‘utåk nohnoh on famör ‘e koro la tatau se iris ne noh e taono. On fuaga, la a’lelei te ma’oi ne mou se nohnoh on famori e ufa, ka tape’ ma la a’vaohian se famör ‘i oris la rere ne pesnese, ma sal ma’oi ne mou se tög’åk ne oris koroa”, ia ‘ea.

Kamat e March ‘e fau te’, rak te’is ta mua ‘e garue te ag’esea on FNU ma TTFB, ma kota hąigarueag mumua tape’it e ta rak ti’u ma kempane pesnese. Iris ne rak’åk te leum ‘e a’häe ma gargarue leum ‘e College of Humanities and Education (CHE ‘e FNU), ka TTFB ta na’ia $65 000 ne tokoa te’age’sea atakoa te’is.

Rak te’is amnåk’åk se gasav saghul ka Covid 19 jen te ma’oi pau ‘e garue’åk ne rak te’; ka amnåk ‘on hąina noh fumou ma ‘oris rako sok’åk “online”. Iris tua’nåk se ‘oris kąurakoga ma ‘oris inea ne kompiuta, ma rako ne’ne’ pau ‘e te’ ne gasava.

Rako ‘e rērē ne pesnese na pot ma a’häe lelei ma’oi, ma na asoa ‘e maj häk ne mou se hąina. Famör re rako ne leum e NFU na a’häe ma garue poto se poag ne amnąki e rak te’is. Resön ti’ ne rak te’is täe se screen-printing, sus ha’u, ösös ma öföf ne leva, ma ösös ne te riamriam fak hanua.

Ososiag ne poto la a’ne’ne’ia majau on famori ta amnåk lamlam ne rak te’is. Ma a’ti’ se’ ‘e av ne “pandemic” te’is, rak tape’i fuag ri ne a’ne’ne’ua te ag’esea po ‘e rak te’is kel’åk pot ne pesnese ne täe ‘e hanua.

E rak te’is pot ma;oi ‘on iris ne rako ‘ut’åk ma kikia se rere la famori la noh a’ne’ne’åk ma kikia oris te‘ag’esea ‘e laloag ne oris pesnese. Rak te’is huala het se mua ‘e oris amnąki e garue fak pesnese. E ‘on fakmuriga, amnåk ne rak te’ la iris ne rako la ‘ut’åk se’ oris poto se level ne Small to Medium size” pesnese, ne level ne SMEs.

Amnåk ti’ pau ne rak te’is la a’ne’ne’ua pot ne pesnese ‘on hąina ma haharągi ‘e hanua ma koro ‘e ufa. Ąiröt’ąkiag ne garue te’is la nohnoh on famori ‘e koro ma hanua ‘e ufa la ‘ut se rere.

Rak te’is ho’am hąian onaghul ‘e kor ‘e Matailobau, Naitasiri. As ne kor ‘i Nairukuruku, Navuniyasi, Taulevu, Delaitaga, Nabena, ma Matailobau. Ma hąina ne rak ‘e rak te’is po oris Certificates ‘e ‘i.

A’VĄHIGA.